ما يضايق المنتقبات :

اولا من غير تعريف طبعا الكل عارف ايه هو النقاب ,, و برضه من غير ما ندخل في نقاش هل هو عباده ام عاده ام سنه ام فرض

خلوني اكلموا علي الحاجات الغريبه الي بتحصل لكل المنتقبات - تقريبا - و بتسبب لهم ذهول و تعاسه في بعض الاحيان للحساسات ^_^

1- المعاكسات :

معلش مش قادره افهم يعني ايه واحد يعاكس منتقبه ؟؟؟ معاليك شايف منها ايه غير عنيها ؟؟؟

وبعدين يا معاكس منك ليه ,, ما البنات ماشيين قدامكوا بكامل هيئتهم ليه تيجو عند المنتقبه و تبصوا ,, يعني الحمد لله البنات التانيه مش حرمنكوا من حاجه احمدوا ربنا بقي و اتلموا :@

وبعدين يعني ايه واحد يعاكس واحده منتقبه يقول لها يا قمر ,, عمري ما عرفت ان من الشنطه او الشوز ممكن يتعرف شكل البنوته O.o

2- يعتبرونك كائنه فضائيه :

اي مكان تروحيه لازم لازم لازم مش اقل من نص الموجودين يبصوا لك بصه اعوذ بالله من غضب الله ,, ليه يا جماعه كده حتي المنتقبات دول شبك جدا و الاسود الي بيلبسوه تحفه :)))

وبعدين لازم علي الاقل 50 بنت يبصوا لك شزرا ,, و لسانهم بيقول اف مليتوا البلد ,, يا زكيه منك ليها ده احنا كده سبنا لكوا البلد ,, احنا بنتغطي عشان نسيب لكوا انتوا .... ;)

بستغرب بقي من حاجه ,, المفروض و المتعارف عليه يعني ,, ان المنتقبه دي من الناس مش هقولك مش بتغلط بس يعني هي سمت اسلامي ,, ازاي بقي في بعض الرجال بيفهموها غلط ؟؟؟؟امال المتبرجات صاحبات اللبس الجارح لعيون حتي الفتيات ,, و الميك اب الصارخ ,, دول تفهموهم ازاي ؟؟ مش هخوض ف الموضوع ده هو مفهوم يعني ..

والحاجه الاكثر استفزازا علي الاطلاق ,,, اما حد ينادي واحده منتقبه ,, يا مدام و يا حجه ,,

طيب بالعقل لو شفنا بنوته تخينه و طويله ,, اه ممكن نقول مادام وحجه ,, انما والله قدامي بنات شكلهم مقطط جدا ويقولها يا مدام ,,

حاجه تحرق الدم ,, لا ولو تلاقي راجل اصلا اكبر من باباكي و يقولك يا امي O.o

وبعدين بقي تريقه سعات ,, لو جيتي تتصوري ,, يقولوا لك هو هيبان يعني ,, ليه لابسه نقاب الاخفي و لا ايه :D

وطبعا بيبان و احلي صور الي فيها منتقبات ,,

لا وسعات لو في مكان عام للاكل ,, تلاقي الناس معديه تبص عليكي ,, كائن فضائي بقي ,, عشان اكيد عاوزين يشوفوا ازاي هتمرري الاكل من خلال النقاب من غير ما ترفعيه :D

ولو دخلتي محل اكسيسوريس ,, يبصوا لك بصه : ايه ده مش انتي منتقبه ؟؟

و لما تعدي من قدام اي محل الكترونيات ,, تقولك : يا فندم معانا عرض علي المصحف الالكتروني :D

ده علي اساس المنتقبات دول ليل نهار علي سجاده الصلاه بس ,,

ولما تغلطي بقي و تروحي تشتري كتاب ,, يعدوا الناس يبصوا علي الي جبتيه ,, اكيد كلها فقه السيره و ابن كثير ,, لو طلع مثلا كتاب رومانسي او اجتماعي ,, ممكن تشوفي اغرب علامات دهشه ف حياتك :D

انا معرفش مين اول واحد دخل الفكر الغريب ده للناس ,, بس بجد الناس اوفر اوي مع المنتقبات ,, زمان من كام سنه كده كان فعلا زي غريب ,, دلوقتي بقي منتشر جدا ,, نادر انك تلاقي حد ميعرفش حد منتقب ,, سوا صاحبتها جارتها زملتها قريبتها ,, الموضوع بقي منتشر

وبقي المفروض فاميلير ,, لكن الناس مخها تربس علي فكره و خلاص ,,

فا انا احب اوجه من هنا كلمه واحده للناس دي و اقولهم ,, ارحموا الناس ربنا يرحمكوا عشان الموضوع سعات بيمسخ اوي ,,