استغفر الله العظيم ..

ايه الصوره دي ..

مش ممكن الفاحشه كده في مدونتي علني..

مش مهم الصوره خليكوا مركزين في الكلام..

اولا : احنا ضحكنا كتير و المدونه قلبت-في الاونه الاخيره- ركزوا علي الاونه دي اوي

ضحك و هزار و ((هبل)) .. و كده الغرض من المدونه .. ما بيطبقش..

وقلنا صغيره و سكتنا .. لكن حاليا بقيت 18 سنه .. ما ينفعش بقي

عشان كده قررت اعمل موضوع حلو كده و صغنتوت..

وحساس جدا .. وممكن اخسر ناس كتير بسببه ..

احم .. ندخل في الموضوع ..

الموضوع الي هتكلم فيه .. والي اثار -ومازال- يثير جدل الكثير ..

هو الاختلااااط..

ثواني محدش يضرب ....

هنتكلم براحه ..

مبدأيا ..

ايه هو الاختلاط: الاختلاط يعني اجتماع الرجال والنساء في مكان واحد ، وامتزاج بعضهم في بعض ، ودخول بعضهم في بعض ، ومزاحمة بعضهم لبعض.. خلاص ادي اول حاجه ..

مبديأ .. مافيش اي خلاف لحد هنا .. ((حطوا خط تحت لحد هنا ))


ثانيا: مش هتكلم عن معني الاختلاط ده .. عشان ماجيش حد (ظريف) يقول لي يا ست انتي بتفتي .. يعني محدش يركب مواصلات ومحدش يشتري من بياعين و ..والخ.. و الكلام اللطتشيف ده ..

ما انتوا عارفين الحجج الغبيه البلهاء ال.. ماعلينا

عشان كده هدخل في الحساس اكتر من ده ..

انا بقي عاوزه اتكلم عن الكلام بين اي ولد و بنت ..

((مش من محارمه يا اذكيه يعني ))

يعني اي علاقه بين اي ولد و بنت سوا (( صداقه .. زماله .. جيره .. ارتباط عاطفي-وده الاسوأ- كده يعني ..))

بصوا انا عاوزه اقول حاجه.. مافيش حاجه في الدين اسمها .. بكلم ولد في كلام محترم ..

لا مااااااافيش حاجه اسمها كده خالص مالص ..

وانا مابقبلش اي حد يقول لي حلال او حرام غير بدليل .. و دليل صحيح كمان ..

لذلك يا حرام الناس الي بتقول ان كده حلال .. مساكين كلامهم مش داخل دماغي .. عشان مافيش دليل..

انا بقي بكلم الناس الي معاهم دليل .. بس فاهمينه غلط ..

الدليل الاول : الايه الي بتقول (( وجعلناكم شعوبا و قبائل لتعارفوا))

الايه اهي .. في ناس دمهمم شربات مش ممكن علي خفه دمهم .. يقولوا لك ايه

اهو ربنا قالنا ((جعلناكم شعوبا و قبائل لتعارفوا)) شات يعني ..

بالله عليكوا في خفه دم اكتر من دي ؟؟

ماكملش الايه الظريف ده..

الايه بقيتها بتقول ((وجعلناكم شعوبا و قبائل لتعارفوا ان اكرمك عند الله اتقاكم ..))

فين التعارف هنا بقي..

دي نقطه ..

النقطه التانيه : دليل بتاع ((و اذا سالتموهن فاسألوهن من وراء حجاب))

يقولوا لك الي دمهم خفيف برده .. و ظرفاااء ..

ان الايه دي دليل قوي و صريح علي صداقه النت .. ماهو من وراء حجاب

ظرفاء اوي ..

الاظرف بقي الي هيصعقهم ..

ربنا سبحانه و تعالي ..

كان يقصد في الايه دي ..

انه بيتكلم عن النقاب ..

يعني المؤمنات يرتدين النقاب..

بصوا الاسلام بيتكلم في ايه..

وهما يقولوا لك صداقه نت ..



- كمان نقطه كمان .. (النهارده يوم منقط ))

لما واحده سخيفه هبله -سوري يا بنات-

تقول لك انا بكلم الولاد في كلام محترم مافيش كلام خارج ..

هرد عليها بتلات حاجات ..

الاول: مافيش دليل عندك بيقول ان ربنا جل جلاله .. قال ان حلال الكلام مادام في اطار الادب .. ماشي..

التاني:ان شور -وانتوا عارفين اكتر مني- مافيش اي علاقه بتكون بريئه الا ما بتطور .. مش لازم تطور يعني غلط كبير..

انما اي تطور .. يا اما هو مره الولد هيقول كلام مش كويس و سط الكلام الكويس .. ومش هينفع تقولي له حاجه ..

او هتحبيه او تعجبي وكده ..

التالت: هو احنا بقينا بنأخد كل الامور و بنقيسها باطار الادب و المنطق و العرف و التقاليد .. و نسينا اهم و احلي مقياس و هو مقياس الدين ؟؟

بصراحه .. انا محبطه من تفكير الشباب .. 99.9%

بيفكروا بغرابه -وظرف- زي ما انتوا شايفين..

هتلاقوا من ده كتير ..

يربطوا حاجات مالهاش دعوه ببعض ..

وادله غلط ..

وادله مالهاش وجود..

وحاجه تشبه طبق رز بالكريما ..

حسبي الله و نعم الوكيل ..

بصوا بقي ..

انا عارفه ان طريقه توصيلي لوجه نظري..

غريبه .. و مش مرتبه ..

لكن ياريت حد -حتي لو واحد- يكون فكر لحظه في كلامي ..

يا جماعه و الله الي احنا -معشر البنات- بنعمله مش بيجيب فايده ..

بمعني .. ان لما واحده ترتبط بواحد .. بتبقي فاكره ان كده خلاص..

هيخلص السنه دي في الكليه .. و سنه جيش .. و هو عنده شقه و عربيه و موبيل و كوتشي كونفرس ..

وخلاص هيجي يتقدم لها .. وهتعيش حياه هانئه .. و هتخلف بيبي -متخلف- قصدي عسل .. و تربيه .. و يطلع جسمه قوي عشان بياكل جبنه لافاش كيريه .. ومثلث الطاقه المتكامل في الجبنه هيطلع له عضلات من سن 4 شهور.. و مش عارفه ايه ..

انا عاوزه اقول رد واحد للي تفكر كده .. رد بعيد عن الدين عشان محدش يكرهني ..

كلمه في منتهي الجمال انا مؤمنه بيها جدا ..

وهي .. ان محدش هيتجوز مرات حد ..

يعني لو ربنا كاتب لك تتجوزي فرغلي .. عمرك ما هتتجوزي حسني مكانه ..

فا خلاص نتعب نفسنا ليه .. اريح حاجه نعد في بيت بابي

حاتين رجل علي رجل .. لحد ما فرغلي يجي .. قصدي عريسنا يعني


خلاص .. لحد هنا شبه خلصت -نص- الي عندي ..

في حد فهم حاجه ؟؟

انا عن نفسي لا
...




ايه الرغي ده ... الساعه دلوقتي 2 و نص .. لازم انام بقي عشان عيني و ايدي وجعوني اوووووووي


المهم يا رب حد يفهم حاجه من الكلام الكتير الي فوق ده .. و الاكتر يا رب حد يؤمن بيه ولو للحظه -حتي لو بعد كده حسه غلط-
اللحظه دي هتبقي مهمه عندي ..

كلمه اخيره لاي بنت .. حاولوا تبقوا غالين مش اي حاجه كده .. ((الموضوع ده هنتكلم عنه بالتفصيل بعدين))

سلام ..


(((14/03/09))